FT : Yanga 3-0 Kagera Sugar

Mabingwa wa ligi kuu ya Vodacom Yanga wamerejea rasmi kwenye mbio za kutetea ubingwa wao kwa msimu wa nne baada ya kuilaza Kagera Sugar mabao 3-0 katika mchezo uliopigwa kwenye uwanja wa Taifa.

Yanga iliuanza mchezo huo taratibu na kuwapa Kagera Sugar nafasi ya kutawala mchezo kwa muda mwingi hata hivyo ilifanikiwa zaidi kupitia mashambulizi ya kushitukiza.

Mabao yote ya Yanga yalipatikana kwenye kipindi cha pili yakifungwa na Ibrahim Ajib kwa mkwaju wa penati kwenye dakika ya 55 baada ya mlinzi wa Kagera Sugar kuunawa mpira aliokuwa ameupigwa mwenyewe.



Aidha kuingia kwa Yusuph Mhilu aliyechukua nafasi ya Thabani Kamusoko kwenye dakika ya 70 kuliiongezea Yanga kasi ya mashambulizi.

Yanga iliandika bao la pili kwenye dakika ya 76 baada ya krosi ya Ibrahim Ajib kufika mguuni kwa Obrey Chirwa ambaye aliwatengea Emanuel Martin na Yusuph Mhilu ambao ni kama waliutumbukiza mpira kimiani kwa pamoja.

Yusuph Mhilu ndiye aliyepeleka majanga kwa Kagera Sugar ambapo krosi yake kwenye dakika ya 88 ilitua miguuni kwa Shemvuni aliyejifunga.

Ushindi wa mabao 3-0 leo umeiwezesha Yanga kufikisha alama 43 sasa ikitofautiana na Simba kwa tofauti ya alama tatu, Simba ikiwa na alama 46.