Yanga itamsajili kiungo mshambuliaji wa Singida BS Bruno Gomez kama kocha mkuu wa timu hiyo Nasreddine Nabi atamuhitaji, imefahamika
Juzi baada ya mchezo dhidi ya Singida BS uliopigwa uwanja wa LITI na Yanga kushinda mabao 2-0, Bruno aliibua maswali miongoni mwa Wananchi baada ya kuonekana kwenye benchi la Yanga kabla ya mchezo akisalimiana na Nabi na wengine wote waliokuwa katika benchi
Baada ya dakika 90 za mchezo kukamilika, Bruno alionekana akizungumza na kiungo mshambuliaji wa Yanga Stephane Aziz Ki
Taarifa kutoka ndani ya uongozi wa Yanga imedokeza kuwa hatma ya Bruno iko mikononi mwa Kocha Nabi ambaye atawasilisha mapendekezo yake baada ya msimu kumalizika
Yanga haitarajiwi kufanya usajili mkubwa katika dirisha lijalo la usajili, itasajili wachezaji wachache bora kwa ajili ya kuimarisha maeneo yenye changamoto
Eneo la kiungo wa ushambuliaji linaweza kuwa moja ya maeneo hayo ili kumuongezea ushindani Aziz Ki
"Suala la Gomez sio suala gumu ni uamuzi wa kocha tu (Nabi) akisema basi atatua Jangwani, hilo hata yeye Nabi anajua, tumemuachia atuambie kiufundi kama anamfaa au vinginevyo," kiongozi mmoja mwandamizi wa Yanga alinukuliwa na Mwanaspoti
Bruno ndiye kinara wa mabao kwenye kikosi cha Singida BS akifunga mabao tisa na kutoa pasi nne za mabao katika ligi kuu ya NBC msimu huu
Anaweza kutumika kama mchezaji kiraka kwani anamudu kucheza katika nafasi zote eneo la kiungo
Mwanzoni mwa msimu Kocha wa Singida BS Hans van Pluijm alimtumia kama kiungo mkabaji (namba 6) baadae akamsogeza namba 8 na sasa anamtumia kama namba 10 eneo ambalo ameonekana kulimudu zaidi akifunga mabao mengi
