Tumebaini kilichotukwamisha - Nsajigwa

Kocha Msaidizi wa Yanga Shedrack Nsajigwa amesema timu yake ilichapwa mabao 2-1 na Township Rollers jana kwa kuwa haikucheza vizuri.

Nsajigwa amewasifu Township Rollers kwa kusema walicheza kitimu zaidi na amewapongeza kwa ushindi huo walioupata ugenini.

Nsajigwa amesema kilichopelekea Yanga kupoteza mchezo huo ni kitendo cha kuwaruhusu wapinzani wao wamiliki mpira kwa muda mrefu hasa kwenye kipindi cha pili.

Lakini amesisitiza kuwa wameyabaini makosa yao na sasa wanajipanga kwa ajili ya mchezo wa marudiano unaopigwa March 17.

"Tumeshajua wapi ambapo tumekosea baada ya mchezo huu, tuliwaacha sana wenzetu wacheze, kikubwa tunajipanga kwa ajili ya mechi ijayo," amesema Nsajigwa.

"Wenzetu wamecheza kitimu zaidi wakati sisi tumefanya makosa mengi sana. Tutahakikisha makosa haya hayajirudii kwenye mchezo wa marudiano."

Naye kocha wa Township Nikola Cavazovic amesema amekuwa akiifuatilia Yanga kwa wiki tatu na kubaini aina yao ya mchezo.

Amewasifu wachezaji wake kwa kuibuka na ushindi huo muhimu wa ugenini lakini amesema bado anaiheshimu Yanga na anadhani bado watakuwa na kazi ya kufanya kwenye mchezo wa marudiano nyumbani, March 17.