Yanga inapiga hesabu za kutwaa ubingwa katika mechi tatu zinazofuata lakini Wananchi wanajua ugumu wa mechi hizo zilizoko mbele yao
Mechi tatu za Yanga zinazofuata ni dhidi ya Kagera Sugar, Simba na Singida Big Stars ambayo pia itakuwa na mechi nyingine dhidi ya Yanga kwenye nusu fainali kombe la Shirikisho la Azam (ASFC)
Kesho Jumanne, April 11 Yanga inaanza mkakati wa kusaka alama tisa kwa mchezo dhidi ya Kagera Sugar
Mtanange huo wa kukata na shoka utapigwa uwanja wa Azam Complex, saa 1 usiku
Katika mchezo wa duru ya kwanza uliopigwa uwanja wa CCM Kirumba, Yanga ilifanikiwa kuibuka na ushindi wa bao 1-0 katika mchezo ambao ni bahati tu ilikuwa upande wa Wananchi
Kagera Sugar walitawala na kutengeneza nafasi nyingi ambazo hawakuzitumia ikiwa ni pamoja na kukosa mkwaju wa penati
Hata hivyo wakati ule Kagera Sugar walikabiliana na Yanga ambayo ilitua Mwanza siku moja kabla ya mchezo wakitokea Tunisia ambako walifanikiwa kutinga makundi ya michuano ya kombe la Shirikisho barani Afrika
Yanga iliunganisha moja kwa moja kutoka Tunisia mpaka Mwanza ambako mchezo huo ulipigwa baada ya ombi la kuahirishwa kugonga mwamba
Wakati huu Yanga inaikaribisha Kagera Sugar ikiwa katika nyakati nzuri. Ile 'fatigue' ambayo iliwakabiliwa wachezaji katika mchezo wa kwanza haipo
Hata hivyo mchezo kati ya Yanga dhidi ya Kagera Sugar haujawahi kuwa mwepesi hasa wakati huu Kagera Sugar wakiwa wameimarika baada ya ujio wa Meckie Mexime
Kagera Sugar wamekuwa na muda mzuri wa kujiandaa na mchezo huo. Wao hawakuwa na mechi yoyote katika kipindi cha wiki tatu
Baada ya kurejea kutoka Tunisia, Kocha Mkuu wa Yanga Nasreddine Nabi alifanya kikao na wachezaji wake kuwaeleza umuhimu wa mechi zinazofuata mbele yao
Nabi alisema wanakabiliwa na mechi ngumu lakini ndio nyakati ambazo wachezaji wanapaswa kuonyesha ubora wao kwa kuhakikisha wanashinda
