Mkwasa aita mashabiki uwanja wa Taifa

Katibu Mkuu wa Yanga Charles Mkwasa amewataka mashabiki kujitokeza kwa wingi kwenye uwanja wa Taifa kuipa sapoti Yanga itakapochuana na Township Rollers kwenye mchezo wa kwanza wa ligi ya mabingwa barani Afrika.

Mkwasa amesema maandalizi kuelekea mchezo huo yamekamilika na wamejipanga kuhakikisha wanaibuka na ushindi.

"Tunawaalika mashabiki wetu waje kwa wingi kwenye uwanja wa Taifa kuipa sapoti timu yao kwenye mchezo huu wa kwanza tunaocheza nyumbani," amesema Mkwasa.

"Tumejiandaa kikamilifu, wachezaji wetu wanafahamu nini wanapaswa kufanya kesho. Hata hivyo tunahitaji sapoti kubwa ya mashabiki."

Mkwasa amesisitiza umuhimu wa kushinda mchezo huo ili kufuzu hatua ya makundi ambayo itawaingizia zaidi ya Bil 1 kutoka shirikisho la soka Afrika (Caf).

"Hii ni mechi kubwa na ya ushindani, mshindi anakwenda kwenye hatua za makundi. Kama mnavyofahamu hatua ya makundi wanasema ni 'money zone' ni eneo ambalo timu inapoingia kuna kuwa hakuna figisu za kutokuwa na pesa."

"Kufuzu hatua hii kutaleta mafanikio kwenye klabu kwa hiyo kila timu inapambana kufika pale ili kujaribu kupunguza japo gharama za maandalizi kwa sababu mashindano haya yanatumia gharama kubwa sana. Sisi tuna nia ya dhati kabisa kufanya vizuri na tumejipanga."

Mchezo huo unatarajiwa kupigwa kesho Jumanne kuanzia saa 10:30 jioni.

Viingilio;

VIP A - Tsh 20,000/-
VIP B na C - Tsh 10,000/-
Mzunguuko - Tsh 5,000/-