Katika mchezo wa kwanza dhidi ya US Monastir ambao ulipigwa Tunisia, Yanga ilifungwa mabao 2-0 yote yakitokana na mipira ya kutenga
Jana Kocha Nasreddine Nabi akabadilisha walinzi wake wa wawili wa kati akiwaanzisha Bakari Nondo Mwamnyeto na Ibrahim Bacca badala ya Yannick Bangala na Dickson Job
Katika mechi za karibuni Nabi amemrejesha Bangala katika eneo la kiungo huku Job akikosekana katika mchezo wa jana nafasi yake ikichukuliwa na Bacca
Wachezaji wote walipambana kuhakikisha wanamuweka mlinda lango Djigui Diarra salama, lakini Bacca alifanya vyema kazi maalum iliyopelekea aanze mchezo wake wa kwanza katika michuano ya Shirikisho msimu huu
Bacca alikuwa kinara wa kuondoa mipira ya kichwa langoni kwani katika mipira saba aliyowania na wachezaji wa Monastir alishinda mitano
Haikushangaza kuona Monastir walikosa mbinu ya kuipenya ngome ya Yanga kwani silaha yao kubwa ni mipira ya kutenga ambayo wachezaji wa Yanga walijitahidi kutosababisha faulo karibu na lango au kona lakini hata ile waliyopiga iliokolewa kwa ustadi mkubwa na akina Baccca na Mwamnyeto
Nabi ameendelea kudhihirisha kazi yake nzuri katika benchi la ufundi akiimarisha viwango vya wachezaji wote
Sasa Yanga safu ya ulinzi wa kati iko katika mikono salama ya Mwamnyeto, Job na Bacca huku Mamadiu Doumbia akisubiri wakati wake
