Yanga inaweza kujihakikishia tiketi ya kutinga robo fainali ya michuano ya kombe la Shirikisho barani Afrika kama itashinda mechi mbili zinazofuata nyumbani
Machi 08 Yanga itashuka uwanja wa Benjamin Mkapa kuikabili Real Bamako kisha kushuka tena katika uwanja huo kuikabili US Monastir Machi 19
Ikiwa nafasi ya pili kundi D na alama nne nyuma ya US Monastir yenye alama saba, kama Yanga itashinda mechi mbili zinazofuata itafikisha alama 10
Wakati Yanga ikichuana na Real Bamako Machi 08, TP Mazembe watakuwa Tunisia kumenyana na Monastir, hizi ndio mechi ambazo zinaweza kuamua hatma ya kundi mapema au la
TP Mazembe wanaweza kufikisha alama 12 kama watashinda mechi zote tatu zilizobaki, mechi mbili dhidi ya Monastir na Real Bamako wanacheza ugenini. Mechi ya kuhitimisha makundi watacheza na Yanga April 02 huko DR Congo
Ni wazi kama Mazembe hawatashinda dhidi ya Monastir iliyowachapa mabao 2-0 katika mchezo wa kwanza uliopigwa DR Congo, watairahisishia kazi Yanga kwa sababu kama watapoteza basi Yanga itatinga robo fainali kama itashinda mechi zake mbili zitakazopigwa uwanja wa Benjamin Mkapa
Lakini pia hata kama Mazembe watapata matokeo ya sare, watakuwa na uwezo wa kufikisha alama 10 kama watashinda mechi mbili zitakazosalia na moja ya mechi hizo ni dhidi ya Yanga ambayo tayari iko mbele kutokana na rekodi ya H2H
Kimahesabu unaweza kusema bado timu zote zina nafasi ya kutinga robo fainali lakini Monastir na Yanga zina nafasi kubwa zaidi kwa sababu zimebakisha mechi mbili nyumbani wakati TP Mazembe na Real Bamako kila moja imebakisha mechi moja nyumbani
Hapa ndipo umuhimu wa alama sita za mechi mbili zitakazopigwa uwanja wa Benjamin Mkapa kwani zinaweza kutosha kuivusha Yanga robo fainali
