Makamu wa Rais wa Yanga Arafat Haji amewataka Wanachama na Mashabiki kutoingia katika kinachoitwa hasira baada ya timu yao kulazimishwa sare ya bao 1-1 dhidi ya Real Bamako katika mchezo wa kombe la Shirikisho uliopigwa Bamako, Mali
Katika mchezo huo Yanga iliongoza mpaka dakika ya 90 kabla ya wapinzani wao kusawazisha bao kwenye dakika za lala salama
Arafat amesema kila mmoja alitamani kuona Yanga inaondoka na ushindi lakini hata alama moja waliyopata ugenini ina thamani kubwa
Amesema benchi la ufundi na wachezaji wameona makosa hayo yanayojirudia na hivyo wanastahili kupewa nafasi ili waweze kuyarekebisha
Kupitia ukurasa wake wa mtandao wa kijamii, Arafat ameandika;
"Sote tulitamani sana kuona tunashinda mchezo wa jana ugenini dhidi ya Real Bamako lakini haikuwa hivyo Mungu alitupangia kupata pointi moja ingawa tulikua na mchezo bora hata kutangulia kuongoza mchezo
Wananchi wenzangu tufunike kombe tusiingie kwenye mtego wa kutengenezewa hasira na wasiotupenda, haya sio matokeo mabaya kwetu kwani hakuna timu ambayo msimu huu inaweza kutubeza kwa ubora.
Wachezaji wetu na makocha wameona makosa na zaidi wameona aina ya mabao ambayo tumeruhusu yote ya makosa yanayojirudia.
Tuwape wachezaji wetu nafasi yao ya kujirekebisha wakati nasi viongozi tukitekeleza wajibu wetu nanyi mashabiki wetu niwaombe tekelezeni wajibu wenu uleule ili tushinde sote nyumbani tarehe 8 Machi 2023
Yapo mengi yalitukwaza kule kama timu ambayo sisi ambao hatukuwepo ni vigumu kuyajua, lakini wachezaji wetu na sisi viongozi tunajua njia za kupita kutumia nafasi ya sisi kuwa nyumbani pia, mtu kwao.
Twendeni Jumatano ya Tarehe 8 Machi 2023 tuendeleze furaha yetu kwani bado tuna nafasi kubwa ya kushinda na kufuzu kuliko kutolewa huu ni uamuzi wetu sote kwa kuamua kwenda pamoja.
Twendeni Wananchi wenzangu kwetu daima mbele nyuma ni mwiko"
