Tuache lawama zisizo na msingi kwa Rostand

Kwa mtazamo wangu nadhani mlinda lango Youthe Rostand katika mchezo wa leo dhidi ya Ndanda FC amefanya vizuri.

Yapo makosa kadhaa aliyokuwa akifanya kama mchezaji mwingine lakini alijisahihisha kwa haraka.

Sidhani kama anastahili kulaumiwa kwa bao la Ndanda lililofungwa na Nasoro Kapama kwenye sekunde ya 35 kipindi cha pili.

Wachezaji wote wa Yanga walizembea katika ukabaji hivyo kupelekea kiungo Tsubi kuwa huru kupenyeza pasi kwa Mrisho Ngassa ambaye tayari alikuwa amemuacha nyuma beki Hassani Kessy.

Ngassa ni mchezaji wa Kimataifa, kubaki yeye pekee na kipa ni nadra sana kufanya makosa na hicho ndicho alichokifanya kwa kutoa pasi murua kwa mfungaji Kapama.

Hivyo wakati mwingine badala ya kulaumu wachezaji wetu ni vyema kuangalia matukio yanayopelekea kufungwa.

Ngassa alikuwa na mchezo mzuri na si ajabu kuchaguliwa kuwa nyota wa mchezo huo.

Nadhani Ndanda wanastahili pongezi kwa bao lile kwani walitumia udhaifu wa wachezaji wa Yanga ambao walichelewa kuirudisha miili yao uwanjani na kujikuta wakishambuliwa kwa kushitukiza.

Na ndio maana baada ya kuingia kwa bao lile, umakini uliongezeka zaidi na Ndanda hawakufanikiwa kusawazisha licha ya kufanya majaribio mengi.