Afisa Habari wa Yanga Ali Kamwe amesema beki mpya wa timu hiyo Mamadou Doumbia hakuweza kutumika katika mchezo wa ligi kuu dhidi ya Ruvu Shooting jana kwa kuwa hakufanya mazoezi na wachezaji wenzake
Kamwe amesema licha ya beki huyo kuwa 'fit' akitokea Algeria alikokuwa na timu ya Taifa ya Mali, benchi la ufundi limehitaji kumpa muda zaidi kwenye kiwanja cha mazoezi ili afahamu mbinu na utamaduni wa Yanga
"Doumbia aliwasili nchini Jumamosi usiku, hakuweza kufanya mazoezi siku iliyofuata kwa sababu alikuwa amechoka sana. Pamoja na kuwa yuko fit, benchi la ufundi liliona hakuna sababu ya beki huyo kuharakisha kumtumia"
"Timu yetu haikuwa na changamoto kwenye eneo la ulinzi kuelekea mchezo dhidi ya Ruvu Shooting. Naamini atakuwa na muda mzuri wa kufanya mazoezi na wenzake kuelekea mchezo wa kombe la FA dhidi ya Rhino Rangers siku ya Jumapili"
"Pengine Wananchi wataweza kumshuhudia katika mchezo huo," alisema Kamwe
Katika hatua nyingine, Kamwe amesema mshambuliaji Kennedy Musonda yuko fiti licha ya kuonekana anachechemea wakati akitolewa katika mchezo dhidi ya Ruvu Shooting jana
Kamwe amesema taarifa ya daktari wa Yanga imethibitisha kuwa Musonda hakuumia bali alipata mstuko wa misuli tu, yuko imara kutumika katika mechi zinazofuata
