Kocha Mkuu wa Yanga Nasreddine Nabi amewapongeza wachezaji wake kwa kuibuka na ushindi wa bao 1-0 katika mchezo mgumu wa ligi kuu dhidi ya Ihefu Fc
Nabi amesema walifahamu mchezo huo ungekuwa mgumu kutokana na ubora wa kikosi cha Ihefu Fc
Nabi amesema kwa uzoefu wake, anafahamu ni kawaida mechi ya kwanza baada ya mapumziko ya wachezaji huwa ni ngumu
Hata hivyo wachezaji walitimiza wajibu wao hasa kwenye kipindi cha pili na kufanikiwa kupata ushindi huo
"Nawapongeza wachezaji kwa ushindi huu. Mchezo haukuwa rahisi sio kwa sababu baadhi ya wachezaji hawakuwepo, tumecheza na timu iliyokuwa ikizuia zaidi. Ihefu Fc wana timu nzuri, wamefanya usajili mzuri ambao umewaongezea ubora zaidi"
"Mechi ya kwanza baada ya mapumziko ya wachezaji sio rahisi, lakini pia kwenye kikosi tulikuwa na wachezaji wapya ambao bado hawajawa kwenye muunganiko mzuri na wenzao"
"Baada ya mapumziko niliwaambia wachezaji wahakikishe wanakaa na mpira ili kuwachosha Ihefu Fc waliokuwa wanajilinda zaidi. Pamoja na mabadiliko tuliyofanya kwenye kipindi cha pili yalitusaidia kuongeza kasi ya mashambulizi na pengine tulistahili kufunga zaidi ya bao moja," alisema Nabi
