Kama kuna watu wanamfundisha Feisal Salum kupimana ubavu na Yanga basi wanakosea sana
Kwani kwa hali ya kawaida siamini kama Feisal aliyeitumikia Yanga kwa jasho na damu anaweza kufanya hayo ayafanyayo mitandaoni
Njia pekee ya Yanga kumruhusu Feisal aondoke ni kufuata taratibu, na sio vinginevyo
Bahati mbaya bado ana mkataba wa zaidi ya mwaka mmoja na nusu hivyo, hizi sinema anazofanya mitandao zinaweza kuja kumgharimu baadae
Badala ya kutumia mitandao ya kijamii kuwapiga vijembe viongozi wake na 'kuwarusha roho' mashabiki wa Yanga, nafikiri alipaswa kutumia muda huo kuwaambia hao wanaotaka kumsajili wafuate taratibu
Namkumbusha tu, Yanga hii ina historia kubwa katika nchi hii, ni Taasisi kubwa ya michezo pengine kuliko zote hapa Tanzania
Haiwezi kuyumbishwa na mchezaji mmoja, asome historia ya Yanga, ataelewa
Mwanzoni wapo mashabiki wengi wa Yanga waliunga mkono jitihada zake za kudai maslahi zaidi, wanafahamu kwa ubora alioonyesha, pengine alistahili zaidi ya kile alichopata
Lakini uungwaji mkono huo ataupoteza kwani sasa ni kama anaikosea heshima Yanga
Pengine anatengeneza mazingira 'kuwakera' Wananchi ili waamue kuvunja mkataba wake na kumruhusu anondoke bure
Bahati mbaya imeshafahamika wapi anataka kuelekea, yawezekana kabisa kama hatafuata taratibu, anaweza akakaa muda mrefu sana pasipo kucheza mpira
Kama Yanga itamuhitaji kambini atapaswa kwenda na kama hatafanya hivyo basi asubiri rungu la kufungiwa na FIFA
