Ni takribani wiki mbili na siku kadhaa zimesalia kabla ya dirisha dogo la usajili kufunguliwa
Katika dirisha hili klabu za ligi kuu zitakuwa na nafasi ya kufanya maboresho ya vikosi vyao kuelekea duru ya pili ya lala salama
Kwa Yanga ni usajili ambao utaweza kuimarisha kikosi kuelekea michuano ya kombe la Shirikisho hatua ya makundi ambayo droo yake itafanyika Disemba 12 nchini Misri
Yanga imeendelea kuimarika siku hadi siku wachezaji walioongezwa katika usajili wa dirisha lililopita wakianza kuonyesha makali yao
Ni wazi kwenye dirisha dogo kocha mkuu wa Yanga Nasreddine Nabi hatakuwa na mahitaji makubwa ya maboresho kwani jeshi lake limekamilika kwa asilimia 90. Pengine ni wachezaji wawili tu ambao Nabi atawahitaji kwenye dirisha dogo
Kwanza ni nafasi ya mlinzi wa kati mwenye uzoefu wa michuano ya Kimataifa. Yanga imepania kufanya vizuri kwenye michuano ya kombe la Shirikisho, hivyo itahitaji beki mahiri zaidi ya hawa waliopo ili kuongeza ubora katika eneo hilo
Pili Yanga inahitaji mshambuliaji mwenye sifa sawa au zaidi ya Fiston Mayele ili kuongeza nguvu kwenye safu ya ushambuliaji
Kwa sasa Mayele amekuwa na mzigo mkubwa kwani amekosa ushindani kutoka kwa Heritier Makambo ambaye ni majeruhi
Nabi alilazimika kumjumuisha kikosini kinda Clement Mzize ambaye anasaidiana na Mayele katika eneo la ushambuliaji
Nje ya maboresho hayo, Wananchi wana timu imara ambayo pasipo na shaka inakwenda kutetea ubingwa wa ligi kuu kwa msimu wa pili mfululizo
Maboresho watakayofanya yatakuwa maalum zaidi kwa ajili ya michuano ya kombe la Shirikisho
