Yanga ni kufa au kupona Shelisheli leo

Wawakilishi wa Tanzania kwenye michuano ya ligi ya mabingwa Afrika, Yanga leo ina kibarua kigumu mbele ya St Louis ya Shelisheli kwenye mchezo wa marudiano wa michuano hiyo hatua ya awali.

Yanga inawavaa wapinzani wao hao huku wakiwa mbele kwa bao 1-0 kufuatia ushindi walioupata kwenye mchezo wa kwanza jijini Dar es Salaam.

Benchi la ufundi la Yanga limesema limekiandaa kikosi chake kupata ushindi katika mchezo huo.

"Tunahitaji ushindi, ndio kitu pekee tulichokifuata huku, hautakuwa mchezo mwepesi kwa sababu kwa namna nilivyowaona wapinzani wetu, si timu ya kuidharau," amesema kocha msaidizi wa Yanga, Shedrack Nsajigwa.

Yanga leo haitakuwa na mshambuliaji wake nyota, Obrey Chirwa, lakini itawategemea nyota wengine, Ibrahim Ajibu na Papy Tshishimbi kuzamisha jahazi la St Louis.

Hafidh Saleh, Meneja wa Yanga amesema wachezaji wote waliosafiri na timu hiyo wako timamu kiafya hivyo ni uamuzi wa benchi la ufundi juu ya nani atacheza.

Kwenye mchezo wa kwanza kwenye uwanja wa taifa, goli pekee la Yanga lilifungwa na kiungo Juma Mahadhi huku pia mashabiki wakishuhudia Chirwa akikosa penalti.

Hata hivyo St Louis ilitumia mfumo wa kujihami zaidi lakini leo wanatarajiwa kucheza tofauti kwa kuwa tayari wako nyuma kwa bao 1-0.