Kocha Msaidizi wa Yanga Cedric Kaze amesema kikosi kiko tayari kwa mchezo wa ligi kuu dhidi ya Mbeya City ambao utapigwa kesho Jumamosi kwenye uwanja wa Benjamin Mkapa, saa 12 jioni
Akizungumza katika Mkutano na Wanahabari kuelekea mchezo huo, Kaze alisema Yanga itaingia kwenye mchezo ikiwa na dhamira ya kushinda ili kuhakikisha wanatimiza malengo waliyojiwekea ambayo ni kutetea ubingwa
Kaze amesema Yanga haichezi kwa ajili ya kulinda unbeaten kwani sio malengo yao, bali wanahitaji kupata matokeo mazuri uwanjani na kufanikisha malengo ya timu mwisho wa msimu
"Tumejiandaa vizuri kwa sababu tunajua Mbeya City mechi zao za karibuni wamefanya vizuri. Hatuna rekodi nzuri nao mchezo uliopita kwenye Uwanja wa Benjamin Mkapa. Ni timu ambayo imekuwa ikitupa changamoto ambayo tumejiandaa kuikabili"
"Ni kweli tuna takwimu nzuri ambayo ni heshima kwa Klabu. Lakini hatuchezi kwa sababu ya rekodi ya unbeaten, tunacheza kushinda ili tufikie malengo yetu. Kwenye mafanikio yetu hatuna malengo ya unbeaten, tuna malengo ya kutwaa mataji yaliyopo mbele yetu. Unbeaten ni matokeo sio mafanikio. Sisi tunataka mafanikio," alisema Kaze
Kaze amesema wachezaji Stephane Aziz Ki na Djigui Diarra wamerejea kikosini baada ya kumaliza kutumikia majukumu ya timu za Taifa
Mchezaji ambaye atakosekana kesho ni Feisal Salum 'Fei Toto' ambaye anatumikia adhabu ya kadi tatu za njano
"Aziz Ki na Djigui Diarra wamerejea kutoka kwenye majukumu ya timu zao za Taifa. Vile vile Yannick Bangala amerejea baada ya kumaliza adhabu yake ya kadi tatu za njano"
