Kikosi cha Yanga kimeondoka Mwanza kurejea Dar wakikabiliwa na mchezo wa ligi kuu dhidi ya Singida Big Stars ambao utapigwa Alhamisi, Novemba 17
Jana wachezaji wa Yanga walionyesha ukomavu katika mchezo dhidi ya Kagera Sugar wakiibuka na ushindi wa bao 1-0 katika uwanja wa CCM Kirumba
Kwa hakika ilikuwa mechi ngumu sana, Yanga walifanya mazoezi siku moja tu tangu ushindi wa bao 1-0 dhidi ya Club Africain na kutinga makundi ya Shirikisho
Mazoezi hayo walifanya siku ya Jumamosi jioni na Jumapili wakashuka dimba la CCM Kirumba kuwakabili Kagera Sugar katika uwanja ambao haukuwa katika ubora baada ya mvua kubwa kunyesha muda mfupi kabla ya mchezo
Safu ya ulinzi ya Yanga chini ya nahodha Bakari Nondo Mwamnyeto walifanya kazi kubwa kuhakikisha wanalilinda lango kwa muda wote wa mchezo
Mlinda lango Djigui Diarra akiwa katika ubora wake, Nondo, Ibrahim Bacca na Dickson Job kwa hakika walipambana kwa jasho na damu. Ulikuwa ushindi wenye thamani kubwa sana kwa Yanga
Wachezaji wa Yanga wamepewa mapumziko ya siku moja na wataanza maandalizi ya mchezo dhidi ya Singida Big Stars siku ya Jumanne
