Kocha Mkuu wa Yanga Nasreddine Nabi amesema pamoja na kutopata muda wa kutosha kujiandaa na mchezo wa kombe la Shirikisho dhidi ya Club Africain, wamedhamiria kushinda mchezo huo
Nabi amesema watacheza kwa tahadhari kubwa akitambua ubora wa Club africain yenye wachezaji wengi chipukizi na mahiri katika mashambulizi ya kushitukiza
Kocha huyo raia wa Tunisia, amesema wanafahamu umuhimu wa mchezo huo na jambo muhimu kwao ni kupata matokeo mazuri hapa nyumbani
"Tunajua umuhimu wa mchezo huu kwetu kwa mashabiki na kwa Watanzania wote kwa ujumla na matarajio yetu ni kuhakikisha tunautumia Uwanja wa nyumbani kupata matokeo mazuri"
"Club Africain wana timu nzuri na Wachezaji wenye uzoefu pamoja na wachezaji chipukizi. Ni wazuri kwenye mipira ya kufa na mashambulizi ya haraka, pamoja na kwamba tunahitaji matokeo mazuri nyumbani pia tutacheza kwa tahadhari tusiruhusu goli"
"Wachezaji wako tayari na wameahidi kupambana, tunaomba sapoti kwa Mashabiki wetu kujitokeza kwa wingi, nguvu yao ni muhimu sana kwenye mchezo wetu wa kesho," alisema Nabi
Katika hatua nyingine Nabi ameeleza masikitiko yake kutokana na ratiba ya mechi mfululizo ambazo kikosi chake kimecheza kwenye ligi na kupelekea baadhi ya nyota wake muhimu kupata majeruhi
Nabi amebainisha kuwa uongozi wa Yanga uliomba mchezo dhidi ya Geita Gold uahirishwe hawakukubaliwa
"Muda ni mchache, tumetoka kwenye ratiba ngumu na mechi zilikuwa zinafatana. Tuliliomba Shirikisho letu kusogeza mbele mchezo wetu wa Ligi dhidi ya Geita Gold lakini hatukupata majibu tuliyoyatarajia. Ratiba hii imetuletea majeruhi kwa baadhi ya wachezaji"
