Kocha Mkuu wa Kipanga FC ya Zanzibar, Hassan Abdulrahman amesema Yanga inaweza kuwaondoa Club Africain kwenye michuano ya kombe la Shirikisho kama watakuwa na umakini katika mechi zote mbili
Kipanga Fc ilikutana na Club Africain katika michuano hiyo hatua iliyopita ikipoteza kwa kufungwa jumla ya mabao 7-0
Mchezo wa kwanza uliopigwa visiwani Zanzibar ulimalizika kwa matokeo ya suluhu ya bila kufungana na Kipanga wakapoteza ugenini kwa kufungwa mabao 7-0
Abdulrahman amesema Club Africain hawachezi soka la nguvu sana lakini wako makini sana katika kutumia nafasi wanazotengeneza
"Yanga wanapaswa kucheza na timu hii kana kwamba hawaifahamu, wasichukue matokeo yetu tuliyopata hapa Zanzibar na kule kwao. Mchezo wao utakuwa tofauti"
"Sisi ni timu changa, hii ni mara yetu ya pili kushiriki michuano ya CAF hivyo hatukuwa na uzoefu na mashindano haya. Lakini ni tofauti kwa Yanga wao wanataka kushinda ili kutinga makundi na hata Club Africain ni hivyohivyo"
"Ubora wa Club Africain uko katika eneo la kati na walinzi wa pembeni. Wao wanacheza mfumo wa 3-5-2, wanatumia mabeki wao wa pembeni kushambulia. Walitumia mfumo huo katika mechi zote mbili tulizocheza nao," alisema Abdulrahman
Aidha mkufunzi huyo wa Kipanga amesema hali ya hewa ya mji ambao Club Africain wanatoka haina tofauti na hali ya hewa ya Dar es salaam na hata uwanja wanaotumia ni wa nyasi asilia kama ulivyo uwanja wa Benjamin Mkapa
"Tulipokwenda Tunisia hujuma waliyotufanyia ni kutunyima kufanya mazoezi katika uwanja uliotumika, tuliouona kwa macho tu. Lakini hali ya hewa haikuwa kikwazo, uwanja wao ni wa nyasi asilia kama ulivyo uwanja wa Mkapa. Tulipoteza mchezo kwa kuwa vijana wetu hawana uzoefu na mashindano haya pamoja na kukosa umakini"
