Kocha Msaidizi wa Yanga Cedric Kaze amesema mchezo dhidi ya Geita Gold ambao utapigwa kesho Jumamosi katika uwanja wa CCM Kirumba, utakuwa wa nne katika siku 10 kwa mabingwa hao wa Tanzania Bara
Kaze amesema ni ratiba ngumu wanayokabiliana nayo lakini watapambana kuhakikisha wanatimiza malengo ambayo ni kushinda mchezo huo
"Mechi dhidi ya Geita Gold itakuwa ya nne tunacheza ndani siku kumi, hakuna mwili wa binadamu unaweza kuhimili hili na ndio maana mnaona baadhi ya michezo tunafanya mabadiliko lakini tunahakikisha hayaathiri utendaji na malengo kwenye kipindi hiki kigumu," alisema Kaze
Aidha akizungumzia mchezo huo, Kaze amesema hautakuwa mchezo rahisi kwani Geita Gold wameimarika lakini pia wana kumbukumbu ya ugumu wa mechi walizocheza nao msimu uliopita
"Timu ya Geita imeimarika sana na toka mwaka jana Geita haijawahi kuwa mechi rahisi. Tunajua tunakwenda kwenye mechi ngumu na wana Wachezaji wenye uzoefu mkubwa wa ligi lakini tumejiandaa vizuri na tutaingia kwenye mchezo wa kesho kwa nguvu kubwa"
Kaze amesisitiza Yanga itaingia kwenye mchezo huo ikiwa na malengo yake na si kufikiria takwimu walizoweka
"Tunaingia kwenye kila mchezo kwa malengo hatuingii kwenye mechi kwa sababu ya kuendeleza takwimu ya kucheza bila kupoteza maana unaweza usipoteze mechi lakini ukakosa kutimiza malengo ya Klabu. Kwetu sisi kitu kikubwa na malengo yetu ni kupata alama tatu kwenye kila mchezo"
