Jana katika mchezo wa ligi kuu kati ya Yanga dhidi ya Simba ambao ulipigwa uwanja wa Benjamin Mkapa, kocha mkuu wa timu ya Taifa ya Uganda Milutin Micho alikuwepo uwanjani kushuhudia mtanange huo uliomalizika kwa matokeo ya sare ya bao 1-1
Akizungumza na wanahabari baada ya mchezo huo, Micho aliyewahi kuwa Kocha wa Yanga, alibainisha kuwa kilichomleta ni kuangalia mchezo hasa kumuona kiungo Mganda Khalid Aucho
Micho alibainisha kuwa bado mahaba yake na Yanga hayajaisha na alifurahishwa na mtanange huo akimtaja Stephane Aziz Ki kuwa mchezaji aliyemvutia zaidi
"Yanga ni familia yangu, nimekuja kuitazama na nimefurahushwa na mchezo wa leo. Nimevutiwa na Aziz Ki ni mchezaji mzuri sana sio kwa sababu amefunga lakini toka dakika ya kwanza mechi inaanza alionesha ana uwezo mkubwa na nguvu nyingi. Hata Aucho (Khalid) amecheza vizuri, yeye anaonekana kuwa mhimili wa Yanga, amekuwa na kiwango kizuri" alisema Micho
Kumekuwa na tetesi nyingi juu ya ujio wa Micho nchini, hata hivyo mwenyewe amesisitiza hakuna jambo jingine nje ya kushuhudia mchezo huo hasa kumuona Aucho ambaye ni mmoja wa wachezaji wake katika timu ya Taifa ya Uganda
"Nilikuja kutazama mechi na si kwa mipango mingine. Bado nina mkataba na timu ya taifa ya Uganda na sijafanya mazungumzo ya timu yoyote zaidi ya kusalimiana na viongozi wa Yanga maana ni wadau wenzangu katika soka"
