Basi utasikia sisi tumeingia makundi wao wanahangaika tu. Ooh.. mara Yanga timu mbovu kazi yao kukamia ligi ya ndani tu wakienda Kimataifa hawana lolote
Katika michuano yoyote, mwishoni kunakuwa na zawadi kubwa ya mshindi ambayo ni kombe ikiambatana na zawadi nyingine
Tangu msimu uliopita Yanga imekusanya jumla ya mataji manne, ligi kuu, kombe la FA na Ngao ya Jamii mara mbili
Yanga ndio klabu iliyopata mafanikio zaidi hapa Tanzania katika kipindi cha kuanzia mwaka 2021,
Lengo kuu la Yanga katika kushiriki michuano mbalimbali ni kushindana na kushinda
Ni sahihi mashabiki wa Yanga kukasirishwa na matokeo ya kule Sudan kwa sababu dhamira ilikuwa kufanya vizuri kwenye michuano ya ligi ya mabingwa
Hata hivyo Wananchi wana nafasi nyingine ya kupambana kwenye michuano ya kombe la Shirikisho kutimiza mipango yao
Unajua kushiriki michuano ya Kimataifa na kuondoshwa pasipo kuchukua ubingwa hakukupi sifa yoyote. Anayesifiwa ni bingwa tu, wengine watapewa pongezi za faraja
Mafanikio ya timu katika michuano mbalimbali yanapimwa kwa idadi ya makombe ambayo timu imechukua katika michuano hiyo
Hakuna kombe linaitwa raundi ya kwanza, makundi, robo fainali au hata nusu fainali
Kama unataka upewe heshima unapaswa kuwa bingwa sio kutamba nimetolewa katika hatua fulani, hiyo sio sifa!
Ni bahati mbaya soka letu limetawaliwa na propaganda zaidi ndio maana kuna timu zinaajiri watu maalum kwa ajili ya kufanya propaganda
Hiki kinakuwa kichaka cha wajanja wachache walio kwenye uongozi kujificha pale mambo yanapokuwa mabaya
Sasa hivi kuna timu hapa Tanzania ikifika robo fainali katika michuano fulani viongozi na wawekezaji wake wanapongezwa na mashabiki kutembea mitaani vifua mbele eti wametolewa robo fainali!
Mimi sijawahi kusikia ubingwa wa robo fainali, au kuna yeyote aliyewahi kusikia timu imepewa kombe kwa kufika robo fainali au makundi?
Jambo la msingi hapa ni kuwa Wanayanga hampaswi kukata tamaa eti kwa kuwa timu yenu imetolewa hatua ya makundi ligi ya mabingwa, wakati mna uhakika msimu huu timu yenu haikuwa tayari kuwa bingwa wa michuano hiyo
Muhimu ni kujipanga ili kuhakikisha timu inafanya vyema kwenye kombe la Shirikisho na lengo la huko iwe ni kuchukua ubingwa na sio kufika robo fainali au makundi kama wale wengine kwani hakuna kombe la robo fainali au makundi
Huu unyonge tunaojivika wakati mwingine hupelekea kutofanya vizuri katika mashindano makubwa tunayoshiriki
Lengu kuu katika mashindano yote iwe ni kutwaa ubingwa halafu mwisho wa msimu tutahesabu nani amefanikiwa zaidi kwa kuangalia idadi ya makombe aliyochukua
