Jumapili majira ya saa 2 usiku Yanga itashuka uwanja wa Al Hilal kule Sudan kuwakabili wenyeji wao katika mchezo wa mkondo wa pili ligi ya mabingwa barani Afrika
Sare ya bao 1-1 katika mchezo wa mkondo wa kwanza uliopigwa jijini Dar es salaam, unawapa faida Al Hilal ya bao la ugenini
Hivyo ni lazima Yanga ikalitafute bao hilo kule Sudan kuweka mambo sawa kabla ya kutafuta mabao mengine ili kushinda mchezo huo
Kama ilivyokuwa kwenye mchezo wa kwanza uliopigwa uwanja wa Benjamin Mkapa, presha ilikuwa kwa upande wa Yanga iliyocheza mbele ya takribani mashabiki 45,000 waliojitokeza kuishangilia timu yao
Kocha Mkuu wa Al Hilal Florent Ibenge alifanikiwa kuwatuliza vijana wake na wakacheza vizuri mchezo huo wakitumia vyema dakika 30 za mwisho ambapo walifanikiwa kusawazisha bao na kutengeneza nafasi nyingi
Al Hilal hawakuwa na umiliki wa mchezo, waliwaachia Yanga wacheze lakini walitumia mashambulizi ya kujibu kila Yanga walipopoteza mpira katika lango lao
Katika mchezo wa marudiano ambao utapigwa uwanja wa Al Hilal siku ya Jumapili, itakuwa zamu ya kocha Nasreddine Nabi kutumia mazingira hayo kuipa Yanga matokeo
Hakuna shaka mashabiki wa Al Hilal watafurika katika uwanja wao na hakuna kitu watahitaji zaidi ya kuona timu yao inaibuka na ushindi mnono, kama ilivyokuwa kwa mashabiki wa Yanga hapa jijini Dar es salaam
Silaha ambayo Ibenge aliitumia katika dimba la Benjamin Mkapa ndio silaha ambayo Nabi atapaswa kuitumia kule Sudan
Huu ni mchezo ambao Yanga inahitaji kushambulia kwa kujibu 'counter-attack' kama walivyofanya Al Hilal hapa Tanzania
Mara nyingi timu inapocheza nyumbani inaamini kuwa na haki ya kupata ushindi hivyo Al Hilal watajaribu kusaka ushindi kwa gharama yoyote hasa ikizingatiwa wanacheza mbele ya mashabiki wao
Hizi ni aina ya mechi ambazo wachezaji wenye kasi kama Fiston Mayele, Bernard Morrison, Tuisila Kisinda, Stephane Aziz Ki kasi yao inaweza kuwa na faida kubwa kwa Yanga
