Wembe ni uleule hadi St Louis

Baada ya ushindi wa mabao 4-1 dhidi ya Majimaji jana, kikosi cha Yanga kinatarajiwa kuandoka Jumapili kwenda Shelisheli kwa ajili ya mchezo wa marudiano dhidi ya St Louis.

Mchezo huo unatarajiwa kupigwa Jumatano February 21.

Msafari wa watu 30, ukijumuisha wachezaji 20, na viongozi 10 unatarajiwa kusafiri kwenda Shelisheli.

Matokeo ya mchezo wa kwanza hayakufurahiwa na wengi kwani ilitarajiwa Yanga kuibuka na ushindi mnono zaidi ya bao 1-0.

Benchi la Ufundi limesema watahakikisha Yanga inamaliza kazi ugenini.

Yanga inakwenda mapema Shelisheli ili kupata muda wa kuzoea hali ya hewa ambayo inaelezwa kuwa ni joto kali wakati huu.

Mchezo huo wa marudiano unatarajiwa kuwa tofauti na uliochezwa jijini Dar es salaam ambao wenyeji walipaki basi kwa muda mwingi huku wakitumia mashambulizi ya kushitukiza.

Kwa kuwa Yanga tayari ina bao moja, wenyeji wao watalazimika kutafuta bao la kusawazisha na hata kufunga mabao zaidi kama watakuwa na lengo la kusonga mbele kwenye michuano hiyo.

Hiyo itatoa nafasi kwa Yanga nayo kuwashambulia na pengine kupata bao la ugenini litakaloigharimu zaidi St Louis.

Kama Yanga itafunga hata bao moja ugenini, St Louis watahitaji kufunga mabao matatu ili waweze kufuzu.