Ni bahati mbaya wakati mwingine mashabiki tunaingia kwenye mkumbo wa vitu ambavyo malengo yake hatuyafahamu
Huko kwenye 'maredio' wachambuzi huanzisha mijadala ya kuwashusha thamani baadhi ya wachezaji wa Yanga
Siku za karibuni amelengwa zaidi nahodha Bakari Nondo Mwamnyeto, bahati mbaya nasi tumeungana nao kuimba nyimbo ambazo hatufahamu malengo yake
Utasikia Mwamnyeto amechoka, ameshuka kiwango, Mwamnyeto sijui hataisaidia Yanga kwenye michuano ya ligi ya mabingwa
Nafikiri kwa sasa ukizungumzia walinzi bora wa kati ndani ya nchi basi utamtaja Mwamnyeto na Dickson Job
Awali walianza na Job wengine wakimhukumu kwa umbile lake lakini kazi yake nzuri uwanjani ikawanyamazisha na sasa wamehamia kwa Mwamnyeto
Katika misimu mitatu mfululizo Mwamnyeto amekuwa mchezaji wa timu ya Taifa na ametumika katika vikosi vya makocha mbalimbali
Yanga inakwenda kucheza ligi ya mabingwa inahitaji wachezaji wenye uzoefu wa mechi za Kimataifa, Mwamnyeto ni mmoja wao
Sio kila mechi mchezaji anaweza kucheza katika ubora uleule lakini kinachoangaliwa zaidi ni ule mchango wake wa jumla kwenye mafanikio ya timu
Kocha Mkuu wa Yanga Nasreddine Nabi hukerwa na maswali ya wanahabari wanaohoji kwa nini timu yake inaruhusu mabao licha ya kuwa hakuna mechi ambayo Yanga imepoteza
Hakuna kocha ambaye anafurahi timu yake iruhusu mabao lakini muhimu ni yale matokeo ya jumla yanayopatikana baada ya dakika 90
Yanga hii imecheza mechi 40 za ligi pasipo kupoteza, Mwamnyeto ni sehemu ya mafanikio hayo
Msimu uliopita pengine Mwamnyeto ndiye mchezaji aliyecheza dakika nyingi zaidi kwenye kikosi cha Yanga
Msimu huu ana bao moja katika mabao sita yaliyofungwa na Yanga kwenye ligi
Huyu ni mchezaji ambaye mchango wake kwenye kikosi cha Yanga hauna mashaka nadhani anastahili heshima
