Kocha wa Yanga, Nasreddin Nabi, anapambana kutafuta stamina kwa wachezaji wake na kikosi hicho kitaendelea na mazoezi yake kwenye fukwe za Coco, Masaki jijini Dar es Salaam
Nabi amekiri kuwa hakupata muda mzuri wa kukiandaa kikosi chake kabla ya msimu kuanza hivyo atatumia muda huu ambao Ligi Kuu Bara imesimama kukisuka kikosi chake.
Alisema ratiba yake inabadilika kutokana na jinsi anavyowaona wachezaji wake baada ya mazoezi, huku akibadilisha aina ya programu yake baada ya kumaliza ya Gym wiki hii na sasa wamehamia ufukweni.
"Siku tatu nyuma nilidhani hatutorudi tena gym, lakini jana (juzi) asubuhi tulifanya mazoezi ya utimamu wa mwili jioni tulikuwa uwanjani na leo (jana) asubuhi tulikwenda ufukweni na jioni uwanjani," alisema kocha huyo
Alisema wachezaji wake wameanza kuelewana kwa kiasi fulani, lakini bado hawajafikia kiwango anachotaka hivyo ataendelea kuyafanyia kazi mapungufu ya kikosi chake.
Nabi alisema malengo yake ni kutetea ubingwa wa Ligi Kuu msimu wa 2022/2023, Kombe la Shirikisho (FA) na kufika nusu fainali ya Ligi ya Mabingwa Afrika.
Katika michezo miwili ya mwanzo ya ligi, Yanga ilishinda 2-1 dhidi ya Polisi Tanzania kabla ya kuwatandika Coastal Union 2-0.
Mchezo wa mzunguko wa tatu wa ligi, Yanga watacheza na Azam FC, Septemba 6, Uwanja wa Benjamin Mkapa, Dar es Salaam kuanzia saa 1.00 usiku
