Afisa Habari wa Yanga Hassan Bumbuli amesema tayari uongozi umefanya uamuzi wa kuwapa mkono wa kwa heri wachezaji wawili wa kigeni
Baada ya kukamilisha usajili wa nyota watano wa kigeni, Yanga imekuwa na wachezaji 14, kanuni za usajili wa ndani zikiwalazimu kupunguza wachezaji wawili ili wabaki 12
"Tumekamilisha usajili wa wachezaji wa kigeni, lakini sasa tumekuwa na wachezaji 14, tumelazimika kuwapunguza wawili ili kukidhi kanuni zetu za usajili wa ndani"
"Tayari uamuzi umeshafanyika, taarifa rasmi itatolewa kupitia utaratibu tuliojiwekea," alisema Bumbuli
Hatma ya kambi Julai 18
Wakati huohuo, Bumbuli amesema mpaka kufikia Julai 18, wachezaji wote watakuwa wamerejea tayari kwa maandalizi ya msimu mpya
Bumbuli amesema uongozi ulitoa siku 10 za mapumziko kwa wachezaji baada ya mchezo wa wa fainali kombe la FA dhidi ya Coastal Union
"Tumepata changamoto kidogo ya ratiba, ligi ilimalizika Juni 29 lakini sisi tulikabiliwa na mchezo wa fainali ya FA, Julai 04 tulitoa mapumziko ya siku 10 kwa wachezaji tukaongeza na siku chache kwa ajili ya wale wanaosafiri nje ya nchi"
"Tunatarajia mpaka Julai 18 wachezaji wote watakuwa wamerejea na utaratibu wa kambi utafahamika. Safari hii tutakuwa makini kuhakikisha yale yaliyotokea msimu uliopita tunayaepuka. Hivyo kama tutaenda nje ya nchi au kambi itakuwa hapahapa nchini tutawafahamisha," alisema Bumbuli
Awali Yanga ilikuwa na mpango wa kwenda kuweka kambi Uturuki lakini kambi hiyo imeahirishwa kutokana na ufinyu wa muda
