Hatimaye mikiki mikiki ya ligi kuu ya NBC msimu wa 2021/22 inakwenda kuhitimishwa leo kwa timu zote 16 kushuka viwanjani
Vita kubwa inatarajiwa kuwa katika nafasi za chini, Mbeya Kwanza ndio timu ambayo imejihakikishia kuteremka daraja mpaka sasa
Huku juu tayari Wananchi wamekabidhiwa ubingwa wao waliotwaa tangu wakiwa na michezo mitatu mkononi
Simba imejihakikishia kumaliza kwenye nafasi ya pili wakati nafasi ya tatu ni Azam Fc
Hata hivyo Geita Gold wanaweza kupanda nafasi ya tatu kama watashinda mchezo wao dhidi ya Coastal Union ugenini iwapo Azam Fc watapoteza mchezo dhidi ya Biashara United
Biashara United wataungana na Mbeya Kwanza kushuka daraja moja kwa moja kama watapigwa na Azam Fc leo
Ruvu Shooting itakuwa nyumbani kuikabili Tanzania Prisons, timu zote zikiwa katika nafasi ya play-off
Timu itakayoshinda inaweza kuondoka katika eneo la play-off kutegemea na matokeo ya michezo ya Yanga dhidi ya Mtibwa Sugar na Dodoma Jiji dhidi ya KMC
Mtibwa Sugar wanahitaji angalau alama moja kujihakikishia kubaki ligi kuu au kucheza play-off, wanakutana na Wananchi ambao wana kiu ya kumaliza msimu pasipo kupoteza mchezo
Mechi zote zitapigwa kuanzia saa kumi kamili jioni
