Kocha mkuu wa mabingwa wapya wa Ligi Kuu Tanzania bara, Yanga, Mohamed Nasreddine Nabi amesema ubingwa huo ni zawadi kwa familia yake ambayo imekuwa ikimfariji mara kwa mara licha ya kuwa mbali nayo
Yanga juzi iliibuka na ushindi wa mabao 3-0 dhidi ya Coastal Union na kutangazwa kuwa mabingwa wapya wa Ligi Kuu Tanzania bara baada ya kufikisha pointi 67 ambazo hazitafikiwa na timu nyingine yoyote, ikiwa imecheza mechi 27 zikibaki tatu.
Mabao ya Yanga yakifungwa na Fiston Mayele aliyetikisa nyavu mara mbili na Ushindi Chiko, mchezo ukipigwa uwanja wa Benjamin Mkapa, Dar es Salaam.
Akizungumza baada ya kumalizika kwa mchezo huo, Nabi alisema ilikuwa safari ndefu hadi kufanikiwa kutwaa Kombe hilo.
"Nimefurahi kupata ubingwa, haikuwa kazi rahisi nawapongeza wachezaji wangu pamoja na Uongozi wa Yanga kwa ushirikiano walionionesha hadi leo (juzi) tumefanikiwa kupata ubingwa," alisema Nabi.
Alisema mechi zote ambazo wamecheza zilikuwa ni kama fainali na kudai kila timu ambayo walicheza nayo ilikuwa inawakamia kwa kiasi kikubwa, lakini walikuwa hawawapi nafasi.
Alisema watauendeleza ushindani huo huo kwenye michezo mitatu iliyobakia ili wamalize msimu huu wakiwa hawajapoteza mchezo hata mmoja.
Amvulia kofia Sureboy
Nabi alimsifia kiungo Salum Abubakar 'Sure Boy' kuwa ni usajili ambao ameupenda kwa sababu ni mchezaji alioyeongeza nguvu ndani ya kikosi cha timu hiyo licha ya nyota huyo kuhitaji kuongezewa vitu kidogo ili kuwa bora zaidi.
"Sure Boy ni moja ya usajili mzuri ambao Yanga walifanya, ameleta nguvu ndani ya kikosi na amesaidia sana safu ya kiungo"
