Jioni ya leo Wananchi wanashuka uwanja wa CCM Kirumba kuikabili Simba katika mchezo wa nusu fainali kombe la Shirikisho la Azam (ASFC)
Baada ya kambi ya siku nne mkoani Shinyanga, Wananchi wataingia uwanja wa CCM Kirumba jioni ya leo wakiwa na dhamira moja tu, kupata ushindi ili kutinga fainali
Katika kikosi cha Yanga leo atakosekana mkongwe Saido Ntibazonkiza aliyesimamishwa sambamba na Dickson Ambundo kutokana na utovu wa nidhamu
Hata hivyo Yanga inao wachezaji wengine ambao wanaweza kucheza katika nafasi yake pasipo matatizo yoyote
Pengine Chico Ushindi leo anaweza kuanza. Baada ya kusumbuliwa na majeraha ya mara kwa mara, Ushindi sasa anaonekana kuwa imara kiafya akicheza kwa takribani dakika 60 katika mchezo uliopita dhidi ya Biashara United
Farid Mussa ni mchezaji mwingine ambaye anaweza kuanza nafasi ya Saido. Ukizungumzia wachezaji ambao wako 'onfire' kwenye kikosi cha Yanga, Farid ni mmoja wao
Bila shaka hakutakuwa na mabadiliko makubwa ya kikosi, ni utamaduni wa makocha wote duniani kutobadili timu ya ushindi
Ni Djigui Diarra na safu yake ya ulinzi yenye Djuma Shabani, Kibwana Shomari, Dickson Job na Bakari Nondo Mwamnyeto wakati Yannick Bangala anaweza kusogezwa kwenye eneo la kiungo akianza na Khalid Aucho
Jesus Moloko, Ushindi/Farid/Ngushi wanaweza kuanza katika nafasi za winga wakati Feisal Salum na Fiston Mayele wakiongoza safu ya ushambuliaji
Suprise pekee inayoweza kutarajiwa ni kwa Salum Abubakar 'Sure Boy' kujumuishwa kwenye kikosi cha kwanza mabadiliko ambayo yanaweza kumrudisha Bangala kwenye eneo la ulinzi
Sureboy amekuwa na kiwango bora sana akiiongezea Yanga ubora kwenye umiliki wa mpira. Fundi huyu hata kwenye viwanja vyenye changamoto yeye anateleza tu kama yuko 'Anfield'
Wananchi wana historia ya kipekee katika uwanja wa CCM Kirumba kwani katika michezo sita waliyocheza dhidi ya Simba, wameshinda minne, kutoka sare mmoja na kupoteza mmoja
