Haturudii makosa Iringa - Lwandamina

Mabingwa watetezi wa Ligi Kuu Tanzania Bara, Yanga, tayari wako mkoani Iringa na benchi la ufundi limesema hawatarudia makosa katika mchezo wao dhidi ya wenyeji Lipuli FC kesho.

Lipuli FC inatarajia kuwakaribisha Yanga katika mechi ya raundi ya 16 itakayofanyika kwenye Uwanja wa Samora uliopo Iringa Mjini.

Kocha Mkuu wa Yanga, George Lwandamina, amesema kwenye ligi hakuna mechi rahisi na hasa katika hatua ya duru la pili ambalo linatarajia kuanza leo kwenye viwanja mbalimbali nchini.

Lwandamina alisema kuwa wamejipanga kuona makosa yaliyotokea katika mchezo wa kwanza hayajirudii na kesho wanaondoka na pointi zote tatu.

"Kimahesabu hakuna ambaye anaweza kusema ana nafasi ya kuwa bingwa, ila ili uwe kwenye nafasi ni lazima ushinde mechi zako zote bila kuangalia matokeo ya mpinzani wao, tunaamini tutafanikiwa," alisema kwa kifupi Mzambia huyo.

Naye Kocha wa Lipuli FC, Suleiman Matola, alisema kuwa amewaandaa wachezaji wake kupambana na kutohofia majina ya wachezaji wa Yanga.

"Kitu kikubwa kwenye mpira ni kuwa na utulivu, ukikosa utulivu unamruhusu mpinzani acheze na atawale mchezo, ukitulia na kila mmoja akitekeleza jukumu lake ninaamini tutazibakisha pointi tatu nyumbani, tulipata pointi moja ugenini, sasa ni zamu yetu kutimiliza malengo ya kucheza nyumbani," alisema kiungo na nahodha wa zamani wa Simba.