Hatimaye ile siku iliyokuwa ikisubiriwa kwa hamu na mashabiki wa soka nchini imewadia
Mchezo namba moja kwa ukubwa katika ligi kuu ya NBC, Yanga dhidi ya Simba unapigwa leo katika uwanja wa Benjamin Mkapa, kuanzia saa 11 jioni
Ni mchezo wa hesabu kwa makocha wa timu zote mbili, kocha Nasreddine Nabi wa Yanga anafahamu kama kikosi chake kitaibuka na ushindi kitajiweka katika nafasi nzuri sana ya kushinda ubingwa kwani watakuwa juu ya msimamo wa ligi kwa tofauti ya alama 16 dhidi ya wapinzani wao Simba
Kocha Pablo Franco wa Simba ametoka kuondoshwa kwenye michuano ya kombe la Shirikisho hatua ya robo fainali kule Afrika Kusini
Ni mchezo ambao unaweza kutoa taswira ya vile wanakwenda kuhitimisha msimu huu
Kama watapoteza mchezo, yale matumaini madogo ya kutetea ubingwa ni wazi watayapoteza na zaidi watalazimika kujikita katika kujihakikishia nafasi ya pili
Lakini pia ni kama hatma ya Pablo iko mikononi mwa mchezo huu, kipigo kutoka kwa Wananchi kitamuweka katika hatari ya kuonyeshwa mlango wa kutokea
Pamoja na kuingia katika mchezo huo wakiwa na mtaji mkubwa wa pointi, Kocha Msaidizi wa Yanga Cedric Kaze amesema watawaheshimu wapinzania wao na kuwa hawafikirii idadi ya pointi walizonazo kwani wanafahamu katika mchezo wowote wa dabi, takwimu hazikupi uhalali wa kushinda
Amesema Yanga itacheza mpira wake wa siku zote, pasi na mikimbio mingi, lakini watachukua tahadhari kwani wapinzani wao nao wana timu nzuri
Pablo yeye ametamba kuwa wana kikosi bora kuliko Yanga na haoni kama mchezo wa leo utakuwa mgumu kwa upande wao
Mwisho wa siku dakika 90 zitaamua nani atalia na nani ataondoka na kicheko!
