Baada ya kukosa burudani ya timu yao kwa timu yao kwa takribani siku 10, burudani inarejea kwa mashabiki wa Yanga kesho Jumamosi April 23 wakati wananchi watakaposhuka uwanja wa Benjamin Mkapa kuikabili Namungo Fc katika mchezo wa ligi kuu ya NBC
Huu ni mchezo muhimu sana kwa Yanga katika kampeni yao ya kuwania ubingwa wa ligi kuu msimu huu
Ushindi utawafanya Yanga waendelee kujikita kileleni mwa msimamo wa ligi kwa alama nyingi zaidi kabla ya mchezo dhidi ya watani zao Simba ambao utapigwa April 30
Kama Yanga itapata ushindi dhidi ya Namungo Fc halafu ikashinda mchezo unaofuata dhidi ya Simba, itafikisha alama 57, alama 16 zaidi dhidi ya timu itakayokuwa inafuata kwenye nafasi ya pili katika msimamo wa ligi
Lakini muhimu zaidi ni kuwa Yanga inatumia mchezo huu kama sehemu ya maandalizi kuelekea mchezo dhidi ya Simba April 30
Ratiba ya awali ilikuwa ikionyesha Yanga isingecheza mchezo wowote wa ligi mpaka April 30 watakapoikabili Simba
Hata hivyo ratiba hii ilikuwa imekaa 'kimtego' sana kwani wachezaji wangekaa takribani wiki tatu pasipo kucheza mechi
Ni kipimo sahihi kwa Yanga kuelekea mchezo huo muhimu ambao unaweza kuihakikishia Yanga ubingwa msimu huu
Namungo Fc imekuwa ikiwapa wakati mgumu Wananchi katika michezo wanayokutana. Tangu walipopanda daraja misimu mitatu iliyopita, si wao wala Yanga waliowahi kupata ushindi kwenye mchezo wa ligi
Hivyo Wananchi wataingia katika mchezo huu wakiwa na shauku ya kutaka 'kuvunja mwiko' wa kukosa ushindi dhidi ya Namungo
