Kiungo wa Yanga, Feisal Salum 'Fei Toto', amesema kwa sasa afya yake inaendelea vizuri na atakuwa tayari kushiriki mchezo wa Aprili 30, mwaka huu wa Ligi Kuu Tanzania Bara, dhidi ya watani zao, Simba
Feisal amekuwa nje ya uwanja kwa takribani wiki tatu akiuguza majeraha ya mguu, amesema kila kitu kinaenda vizuri na mbali ya kuendelea na tiba, lakini ameshaanza mazoezi mepesi
"Namshukuru Mungu afya yangu inaendelea kuimarika, yale maumivu niliyokuwa nikiyasikia hivi sasa yamepotea na tayari nimeanza mazoezi mepesi, naamini hadi kufikia siku ya mchezo wetu na Simba nitakuwa tayari," amesema Feisal.
Kiungo huyo amesema binafsi ameupania mchezo huo, kwa sababu anaamini ndio umeshikilia hatma yao ya ubingwa, hivyo anataka kuwa sehemu ya mchezo ili kuingia kwenye kumbukumbu ya klabu hiyo.
Amesema anafurahishwa na mwenendo wa timu yake katika mechi kadhaa walizocheza hivi karibuni, ambazo walishinda.
Feisal amesema hiyo imeonesha namna walivyodhamiria kulisaka taji hilo msimu huu, baada ya kumaliza misimu minne bila ubingwa
