Akiwa ameshinda tuzo ya mchezaji bora wa ligi kuu mwezi February 2022, mshambuliaji Saido Ntibazonkiza amesema tuzo hiyo imemuongezea mzuka na atahakikisha anapambana katika michezo iliyosalia kuisaidia Yanga kutimiza malengo yake
Saido alianza msimu huu taratibu lakini baada ya kuaminiwa na Kocha Nasreddine Nabi kufuatia majeraha ya Yacouba Songne, mshambuliaji huyo wa kimataifa wa Burundi amekuwa mchezaji muhimu kwenye kikosi cha kwanza akifunga na kutoa pasi za mabao
Saido amefunga mabao sita kwenye ligi na kutoa pasi tano za mabao katika mashindano yote
Katika mchezo uliopita wa ligi kuu dhidi ya Azam Fc, Saido alisababisha mkwaju wa penati ulioirejesha Yanga mchezoni na baadae kushinda kwa mabao 2-1
"Hii tuzo imenipa hamasa kubwa ya kujituma zaidi katika mechi zilizobaki, kwani najiona nina deni kubwa. Wachezaji wote tunapaswa kupambana kuhakikisha tunatwaa ubingwa. Tuzo hii itarudi tena Jangwani kabla ya msimu kumalizika," alisema Saido
Wachezaji watatu wa Yanga Saido, Feisal Salum na Fiston Mayele wameshinda tuzo ya mchezaji bora wa mwezi msimu huu wakati kocha Nasreddine Nabi ameshinda tuzo ya kocha bora wa mwezi mara mbili katika msimu huu
