Jambo la kujivunia katika kikosi cha Yanga msimu huu, ni timu kutotegemea mchezaji mmoja katika kupata matokeo
Mashabiki wanayo haki ya kuhoji kwa nini majeruhi ni changamoto kubwa kwa timu yao, lakini pia wanapaswa kupongeza kazi kubwa iliyofanywa na benchi la ufundi kuwafanya wachezaji wote kuwa tayari kuipigania timu pale wanapopewa nafasi
Kumekuwa na mabadiliko ya kikosi kutoka mchezo mmoja hadi mwingine lakini Wananchi wameendelea kupambana na kupata matokeo
Leo Yanga itashuka uwanja wa Azam Complex kuikabili Azam Fc katika mchezo muhimu wa ligi kuu
Jana Kocha Msaidizi Cedric Kaze alithibitisha kuwa Feisal Salum na Khalid Aucho hawatakuwa sehemu ya mchezo huo kutokana na changamoto ya majeruhi inayowakabili
Hii ina maana katika nafasi zao kocha Nasreddine Nabi ataweka wachezaji wengine, Saido Ntibazonkiza akitarajiwa kurejea kikosini baada ya kupona majeraha na Salum Abubakar 'Sure Boy' ambaye anatimiza vyema majukumu ambayo huwa yanafanywa na Aucho
Farid Mussa katika mechi za karibuni ametumika kama mlinzi wa kushoto, anaweza kukosekana leo baada ya kuugua lakini jambo jema ni kuwa Yassin Mustafa, David Bryson na Kibwana Shomari wote wamerejea
Kaze pia alidokeza kuwa yawezekana Yannick Bangala leo atakosekana baada ya kuumia mazoezini hatma yake ilitegemea mazoezi jana
Kama atakosekana, inaweza kuwa nafasi kwa Zawadi Mauya kurejea kwenye kikosi cha kwanza akicheza sambamba na Sure Boy
Winga Jesus Moloko nae amepona na kurejea mazoezini, kama benchi la ufundi litajiridhisha na utayari wake, anaweza kutumika leo
Mabadiliko makubwa yanatarajiwa kwenye eneo la kiungo tu kwani safu ya ulinzi na ushambuliaji hakuna changamoto kubwa
