Kocha Mkuu wa Yanga Nasreddine Nabi amesema pamoja na kutambua ugumu wa ligi kuu ya NBC msimu huu, bado waamuzi wana jukumu la kulinda afya za wachezaji
Nabi ametoa kauli hiyo kufuatia mfululizo wa majeruhi yanayoikumba klabu ya Yanga katika kila mchezo ambapo mpaka sasa wachezaji takribani saba ni majeruhi
Nabi amesema anatambua kwamba Ligi ni ngumu na timu nyingi zinapambana kupata matokeo hivyo kutokea migongano mingi baina ya wachezaji inayosababisha majeraha lakini anashangazwa kwanini katika kila mchezo nyota wake zaidi ya wawili lazima waumie majeraha yanayowaweka nje muda mwingi
"Tunafahamu Ligi imekuwa ngumu wachezaji wanajitoa sana kusaka ushindi kwahiyo migongano inatokea ni jambo la kawaida, lakini kwanini inatokea sana kwa wachezaji wetu tazama mchezo huu tunakosa wachezaji wengi muhimu ukiacha Shaban na Ushindi ambao wana Malaria"
"Kwahiyo tunaomba waaamuzi walinde wachezaji siyo wa Yanga tu bali wawalinde wachezaji wote na kuwaepusha na haya maaumivu yanayozigharimu timu zao," alisema Nabi
Nabi amethibitisha kuwa wachezaji Khalid Aucho na Saido Ntibazonkiza nao watakosekana katika mchezo dhidi ya Geita Gold baada ya kupata majeraha
Wanaungana na Chrispine Ngushi, David Bryson na Yacouba Songne ambao bado wako nje wakiendelea kuimarika huku Ushindi na Shabani Djuma wakiwa wagonjwa
Pamoja na kuwakosa wachezaji hao, kocha msaidizi wa Yanga Cedrick Kaze amesema kikosi chao kiko imara kuzisaka alama zote tatu dhidi ya Geita Gold
"Hatuwezi kuyumba kwa kuwakosa wachezaji hao kwani walishakosekana katika michezo iliyopita na tukashinda. Ni jukumu letu benchi la ufundi kuangalia nani wanaweza kuchukua nafasi zao kwani tuna wachezaji wengi wazuri," alisema Kaze
