Mashabiki wa Yanga wanatamani kuona winga Chico Ushindi akipewa nafasi ya kuanza kwenye mchezo wa kombe la FA raundi ya tano dhidi ya Biashara United ambao utapigwa Februari 15 katika uwanja wa Benjamin Mkapa
Ushindi ametumika kwa takribani dakika 10 katika kila mchezo dhidi ya Mbuni Fc (kirafiki), Polisi Tanzania, Mbao Fc(FA) na Mbeya City
Katika michezo hiyo Chico alionyesha uwezo mzuri wengi wakifurahishwa zaidi na kiwango alichoonyesha juzi katika mchezo dhidi ya Mbeya City uliomalizika kwa suluhu ya bila kufungana
Chico angeweza kuifungia Yanga bao la ushindi kwenye dakika za majeruhi kama angetumia nafasi ambayo aliitengeneza kwa kushirikiana na Feisal Salum 'Fei Toto'
Kocha Mkuu wa Yanga Nasreddine Nabi amesema Chico bado hayupo katika utimamu kwa asilimia 100, lakini ameendelea kuimarika
"Chico ni mchezaji mzuri, tulikuwa na sababu ya kumsajili, amejiunga nasi akitoka kwenye majeraha wakati akiitumikia TP Mazembe. Tunaendelea kuimarisha utimamu wake ili awe sawa na wenzake. Nafikiri mashabiki wasiwe na wasiwasi wakati utafika, watafurahia kazi yake," alisema Nabi
Baada ya kulazimishwa suluhu dhidi ya Mbeya City, Yanga inahitaji kushinda mchezo unaofuata wa ligi dhidi ya Mtibwa Sugar ambao utapigwa Februari 23 uwanja wa Manungu, Morogoro
Yanga inaendelea kubaki kileleni mwa msimamo wa ligi ikiwa na alama 36, alama tano mbele ya Simba inayoshika nafasi ya pili huku pia Simba waikiwa wamecheza mechi moja zaidi
