Kocha Mkuu wa Yanga Nasreddine Nabi amesema walihitaji kushinda mchezo dhidi ya Mbeya City lakini wameyakubali matokeo ya suluhu yaliyopatikana katika mchezo huo
Nabi amesema mchezo ulikuwa wa vipindi viwili ambapo kipindi cha kwanza Mbeya City walikuwa bora katika katika kujilinda wakiweka idadi kubwa ya wachezaji eneo la kati hivyo kuwapa wakati mgumu vijana wake
Nabi amesema mabadiliko ya mbinu aliyofanya kwenye kipindi cha pili yaliongeza kasi ya mashambulizi na kutengeneza nafasi nyingi, lakini hawakuweza kuzitumia
"Ulikuwa mchezo wa kiufundi, Mbeya City walizuia vyema hasa eneo la kiungo uliona kipindi cha kwanza hatukuwa na madhara sana lakini tulibadili mbinu katika kipindi cha pili na tulitengeneza nafasi nyingi lakini hatukuweza kufunga," alisema Nabi
Aidha Nabi ametetea uamuzi wa kutomtumia kiungo Feisal Salum 'Fei Toto' tangu kipindi cha kwanza akisisitiza kuwa fundi huyo kutoka visiwani Zanzibar hakuwa sababu ya wao kukosa ushindi
"Tatizo halikuwa Feisal, nadhani kama timu tulifanya makosa mengi hasa kwenye kipindi cha kwanza, tulikuwa na nafasi za kufunga mabao lakini hatukuweza kuzitumia. Naheshimu uwezo wa Feisal ni mchezaji mzuri"
Kuingia kwa Feisal kulibadili taswira ya mchezo ambapo Nabi alimtoa David Bryson na kumrudisha Farid Mussa kucheza mlinzi wa kushoto
Feisal amerejea kikosini hivi karibuni baada ya kupona majeraha yaliyomuweka nje kwa wiki mbili
