Mlinda lango wa Mbao FC, Wandwi Jackson amesema Fiston Mayele ni mchezaji hatari ambaye ataendelea kuzinyanyasa timu pinzani kama safu zao za ulinzi hazitakuwa makini nae
Mayele alifunga bao pekee la Yanga katika mchezo wa kombe la FA akimtungua mlinda lango huyo na kuipeleka Yanga hatua ya 16 bora.
Wandwi amesema kwa dakika zote 90 alizokuwa golini mtu ambaye alikuwa hatari zaidi ni Mayele kutokana na mikimbio yake na kujua kukaa kwenye maeneo ambayo ni hatari kama mabeki hawakuwa makini.
"Huyu jamaa yupo vizuri chini, yupo vizuri juu, wakati wenzake wana mpira, yeye anajua wapi aende kukaa ili iwe rahisi kwake kucheza. Halikimbii goli, muda wote wenzake wakitaka kupiga krosi yupo golini, ndiyo maana nilikuwa nawapigia kelele sana mabeki wangu na kuwakumbusha wamchunge sana kwa sababu wachezaji wote wa Yanga ndiyo wanamtegemea yeye na kumpigia yeye tu krosi, na jinsi anavyopambana kuipata mipira.
"Niliwaambia mkizembea wakati wowote anaweza kutudhuru na kweli, mpira huo huo wa krosi ndiyo uliotudhuru kwa kosa moja tu," alisema Wandwi
Mayele amefunga mabao sita kwenye ligi kuu akiwa anashika nafasi ya pili nyuma ya Reliants Lusajo wa Namungo Fc mwenye mabao saba
Katika mechi zote akiwa na Yanga msimu huu, Mayele amehusika katika mabao 18
