Ukiangalia mwenendo wa ligi kuu ya NBC, Yanga wako kileleni mwa msimamo wa ligi kwa miezi kadhaa sasa wakiongoza kwa tofauti ya alama nane dhidi ya Simba inayoshika nafasi ya pili
Simba wana mchezo mmoja wa kiporo ambao hata kama watashinda watakuwa na deni la alama tano kuweza kuifikia Yanga hapo juu
Katika msimu uliopita pia Yanga iliongoza ligi kwa muda mrefu lakini hawakuweza kuendeleza kasi hiyo mpaka mwisho na Simba kufanikiwa kutwaa ubingwa kwa msimu wa nne mfululizo
Akihojiwa na Wasafi FM katika kipindi cha michezo jana, Afisa Habari wa Simba Ahmed Ally alitumia kilichotokea msimu uliopita kuwapa imani mashabiki wa Simba kuwa hata msimu huu mambo yatakuwa vilevile
"Sisi muda wetu wa kuongoza ligi bado haujafika. Ni kawaida yao wanaongoza ikifika wakati flani wanakata upepo na hapo sisi tunachukua nafasi yetu hadi ubingwa," alisema Ahmed
Hata hivyo Msemaji wa Yanga Haji Manara amejibu kauli hiyo akibainisha kuwa maisha ya kukariri hayana nafasi kwani msimu huu ni tofauti kabisa na msimu uliopita
Manara amesema licha ya kuwa wamejipanga kwelikweli kuhakikisha yaliyotolea msimu uliopita hayajirudii, lakini pia wana kikosi bora zaidi kuliko timu yoyote
"Hao wanajitoa ufahamu lakini Yanga ndio timu bora mara dufu kuliko wao kwa takwimu zote. Sisi tumejipanga na jambo uzuri tunafahamu njia zao za 'shupli' na mbinu ambazo wamekuwa wakitumia"
"Soka sio mchezo wa kukariri kuwa jana ni leo na leo ni kesho, dakika 90 ndizo zinazoamua mshindi," alitamba Manara
Msimu huu Yanga inajivunia safu bora ya ushambuliaji ambapo kwa mujibu wa takwimu Yanga ndio timu iliyofunga mabao mengi kuliko timu nyingine lakini pia ndio timu iliyoruhusu mabao machache
Fiston Mayele ndiye kinara wa mabao akiwa amefunga mabao sita akifuatiwa kwa karibu na Feisal Salum (4), Saido Ntibazonikza (4) na Jesus Moloko (3)
Changamoto ya Yanga msimu uliopita ilikuwa kwenye safu ya ushambuliaji kwani timu ilikuwa haifungi idadi ya mabao ya kutosha na kupelekea michezo mingi kumalizika kwa sare
Msimu huu Yanga imefunga wastani wa mabao mawili katika kila mchezo
