Mlinda lango wa Yanga Abultwalib Mshery amesema anaamini atajifunza mengi kutoka kwa Djigui Diarra ambaye ndiye kipa namba moja wa Yanga
Mshery amesajiliwa na Yanga katika dirisha dogo la usajili akichukua nafasi ya Ramadhani Kabwili ambaye mkataba wake umemalizika
Aidha ujio wake ulikuwa maalum kuwa mbadala wa Diarra ambaye anakabiliwa na majukumu ya Kimataifa akiwa na Mali inayoshiriki michuano ya Afcon 2021 huko Cameroon
Mshery alianza katika mchezo wa ligi kuu dhidi ya Dodoma Jiji akipata cleansheet yake ya kwanza akiwa na Yanga katika mchezo ambao Wananchi waliibuka na ushindi wa mabao 4-0
Pia alidaka mechi zote tatu za michuano ya kombe la Mapinduzi isipokuwa mikwaju ya penati katika mchezo dhidi ya Azam Fc
Mshery amesema anajisikia faraja kufanya kazi na Diarra, mlinda lango mwenye uzoefu mkubwa wa michuano ya Kimataifa
"Nimefurahi kuja kufanya kazi na Diarra kwani nafahamu ni kipa mzuri ambaye ana uzoefu mkubwa wa michuano ya Kimataifa. Pia amefanya vizuri katika michezo yote aliyodaka hapa Yanga"
"Kwangu mimi itakuwa nafasi nzuri kujifunza mambo mengi kutoka kwake, naamini kufanya kazi nae nitaimarika na kuwa bora zaidi," alisema Mshery katika mahojiano na mhamasishaji wa Yanga, Haji Manara
Mshery anatarajiwa kuwa langoni siku ya Jumapili kwenye mchezo wa ligi kuu dhidi ya Coastal Union ambao utapigwa uwanja wa Mkwakwani
