Siku yake moja ya mazoezi pale Avic Town imetosha kumshawishi kocha mkuu wa Yanga Nasreddine Nabi ambaye amesema kiungo Salum Abubakar 'Sure boy' ataimarisha zaidi safu yake ya kiungo
Nabi amesema Sureboy ni mmoja wa viungo mahiri wa ndani, ujio wake Yanga utakuwa na manufaa kwa mabingwa hao wa kihistoria
Amemfananisha Sureboy na Khalid Aucho ambaye anapendezesha eneo la kiungo la Yanga anapokuwa uwanjani
"Nimefurahia sana usajili huu. Nimeangalia ubora wake hapa, amenionyesha kwamba ni mmoja kati ya wachezaji bora wa hapa Tanzania atakayetusaidia sana," alisema Nabi.
"Kwa sasa unapomkosa Aucho unakuwa huna presha kwa sababu una mwingine (Sure Boy). Nafikiri tuko sawa eneo la kiungo, hatuna wasiwasi tena kama ilivyokuwa hapo kabla"
Nabi amesema kuwa Sure Boy anaweza kupiga pasi za aina zote fupi na ndefu, lakini pia akimudu kuhama nafasi moja kwenda nyingine katika kumiliki eneo la kiungo
