Baraza la Michezo la Taifa (BMT) na Ofisi ya Msajili wa Vyama na Klabu za Michezo Tanzania wamepitisha Katiba mpya ya mwaka 2021 ya Yanga ambayo iliridhiwa kwenye mkutano mkuu wa wanachama wa klabu hiyo uliofanyika Juni 27, mwaka huu, Dar es Salaam.
Kukamilika kwa usajili wa Katiba hiyo, sasa kunaruhusu mchakato wa mabadiliko ya mfumo wa uendeshaji wa Yanga kuendelea kama ambavyo imeanishwa katika mabadiliko ya katiba hiyo.
Mtendaji Mkuu wa Yanga, Senzo Mazingiza amesema kukamilika kwa mchakato huo kunatoa fursa kwa yeye na timu yake kuanza kukamilisha mambo mbalimbali ambayo waliwaahidi wanachama wao kwenye mkutano mkuu ili kuona kwa vitendo mabadiliko waliyokusudia.
"Ni jambo zuri ambalo limemfurahisha kila mmoja wetu, unajua Yanga ni timu kubwa na haya mabadiliko tunayokwenda kuyafanya yataonesha namna mchezo wa soka ulivyo na faida siyo kwa Yanga tu, bali na taifa la Tanzania kwa ujumla."
"Kwahiyo tuipongeze serikali kwa kuridhia kupitisha mabadiliko haya nadhani sasa ni zamu ya mimi na timu yangu kuanza kutekeleza yale yote ambayo tumekusudia kuifanyia Yanga ikiwemo mabadiliko ya kiuendeshaji, miundombinu mizuri, usajili mzuri, lakini pia mafanikio ya ndani ya uwanja," alisema Senzo
