Michuano ya Cosafa imenijenga - Raphael Daudi

Kiungo wa Mbeya City ambaye anategemea kutua Yanga, Raphael Daudi amesema mashindano ya Cosafa yamemsaidia kumjenga kujiamini zaidi.

Katika mahojiano ya mtandao wa michezo wa MWANASPOTI, Daudi amesema uzoefu alioupata katika mashindano hayo utamjenga kuwa mchezaji bora zaidi kwenye ligi msimu ujao.

Kuhusu taarifa ya kuwa amesajiliwa na Yanga, Daudi amekiri mpango huo upo kweli lakini akagoma kuzungumza zaidi akidai bado mambo hayajakamilika.

"Mpango huo upo, ila bado sijakamilisha, nikiwa tayari nitawajulisha," amesema.

"Nimejifunza mengi katika Cosafa, kuanzia kwa wachezaji niliokuwa nao pamoja na timu zilizoshiriki jinsi ambavyo zilikuwa zinapambana kuonyesha vitu vya tofauti na kwamba soka lina heshima yake," alisema kiungo huyo.

Kitendo cha kocha wa Stars, Salum Mayanja kumpa nafasi ya kucheza ndani ya kikosi chake, alikiona kama kimefika wakati mwafaka kwake akitoa sababu ya msimu unaokuja anauona una jipya pia ushindani kuwa mkali.

"Siwezi kufunguka zaidi, msimu ujao itajulikana kwa nini nasema nimepata ujasiri na kujiamini kupitia Cosafa, iliyoniongezea hatua nyingine."