Kocha Mkuu wa Yanga Nasreddine Nabi Jumamosi anatarajiwa kufanya mabadiliko ya lazima katika kikosi chake baada ya mshambuliaji Yacouba Songne kuumia
Yacouba yuko Tunisia akiendelea na matibabu baada ya kuumia goti katika mchezo uliopita dhidi ya Ruvu Shooting
Tayari amefanyiwa upasuaji na anaweza kuwa nje ya dimba kwa miezi mitatu au zaidi
Nabi amekiri kuwa hakupenda kumkosa mshambuliaji huyo kwenye kikosi chake kwani amekuwa na mchango mkubwa lakini anao wachezaji wengi ambao anaweza kuwatumia
"Kumkosa Yacouba ni pengo tunamuombea apone haraka, lakini maisha lazima yaendelee tunatakiwa kuwa na akili mpya ya jinsi tutakavyocheza sasa na nani ataingia eneo hilo au kwingine," alisema Nabi
Nabi mwenye uraia pacha wa Ubelgiji na Tunisia, amedokeza kuwa anawaangalia nyota wwatatu ambao ni Feisal Salum, Farid Mussa na Mukoko Tonombe kwa jinsi gani wanaweza kufanya mabadiliko chanya ya kimbinu
"Tunaweza kuangalia matumizi mengine ya Feisal kama tutaona atafaa, lakini tuna Farid nimekaa naye Zanzibar tumefanya vikao kuna mambo nataka abadilike awe na kiwango bora zaidi, wakati mwingine tuna Mukoko ni mchezaji muhimu naye tutamuangalia"
"Siwezi kuweka wazi jinsi gani tutabadilisha mbinu zetu, hayo tutayafanyia kazi huku ndani, lakini wako wengi ambao tunaweza kuangalia jinsi tutakavyowatumia ili tuwe bora zaidi"
Farid na Mukoko walikuwa sehemu ya kikosi cha Yanga kilichoshiriki maadhimisho ya mwaka mmoja wa Rais wa Zanzibar Dk Hussein Ali Mwinyi, walifanya vizuri katika michezo miwili dhidi ya Mlandege na KMKM
