Jana Yanga ilirejea mazoezini ikiwa na kikosi kamili kukamilisha maandalizi ya mwisho kuelekea mchezo wa ligi kuu dhidi ya KMC ambao utapigwa uwanja wa Majimaji Jumanne, Oktoba 19 2021
Baada ya kujifua kwa wiki nzima pamoja na kucheza mchezo wa kirafiki dhidi ya JKU, Kocha Mkuu wa Yanga Nasreddine Nabi aliwapa mapumziko ya siku mbili wachezaji ambao hawakuwa na majukumu ya timu za Taifa
Sasa wameungana na wenzao waliokuwa katika timu za Taifa, wakianza na mazoezi makali ya ufukweni na Gym
Nabi amesema program ya mazoezi anayowapa wachezaji wake ni sehemu ya mpango wake kuelekea mchezo dhidi ya KMC
"Tunafanya mazoezi ya aina mbalimbali, kwa sasa tumezingatia zaidi kujenga stamina, wachezaji wanatakiwa kuwa imara, ligi ni safari ndefu, wanatakiwa wawe katika kiwango cha juu cha kushindana kuanzia mwanzo hadi mwisho wa msimu"
"KMC ni moja ya timu ambazo wachezaji wake wanatumia nguvu, ninajua namna ambavyo tutawakabili, naamini tutapata kile ambacho tunakihitaji kama timu," alisema Nabi
Aliongeza kurejea kwa wachezaji wake waliokuwa kwenye timu za taifa mbalimbali kutawanufaisha kwa sababu huko pia walikuwa kwenye mazoezi magumu na yenye kuhitaji kuzalisha matokeo chanya.
"Tunahitaji ushindi katika mechi hiyo ili kutuweka kwenye nafasi nzuri, tukipata matokeo mazuri yatatuweka kwenye nafasi nzuri ya kuelekea katika maandalizi ya kuwakabili Azam, mechi zote zinahitaji kuwa na kikosi imara"
Yanga inatarajiwa kuelekea Ruvuma keshokutwa Jumapili tayari kwa mchezo huo ambao utapigwa Jumanne
