Ni misimu kadhaa Yanga imeshindwa kupata ushindi katika michuano ya ligi ya mabingwa inapocheza nyumbani katika uwanja wa Benjamin Mkapa
Matokeo ya jana kufungwa bao 1-0 dhidi ya Rivers United, ni mwendelezo wa Yanga kushindwa kutumia uwanja wa nyumbani kwenye michezo ya Kimataifa
Tangu msimu wa 2016/17, Yanga haijashinda mechi zake za ligi ya mabingwa zilizopigwa katika uwanja wa Benjamin Mkapa
Katika msimu huo walilazimishwa sare ya bao 1-1 dhidi ya Zanaco Fc ya Zambia na baadae kwenda kutolewa kule Zambia kwa matokeo ya suluhu ya bila kufungana
Msimu uliofuata wakacheza na Township Rollers hapo kwa Mkapa Yanga wakalala kwa mabao 2-1 na baadae kulazimisha suluhu ya bila kufungana kule Botswana
Msimu wa 2019/20 Yanga ikacheza tena na Township Rollers katika uwanja wa Benjamin Mkapa na kulazimishwa sare ya bao 1-1 na baadae kwenda kupata ushindi wa bao 1-0 kule Botswana
Ni katika msimu huohuo wakakutana na Zesco United katika mchezo wa raundi ya kwanza uliopigwa jijini Dar es salaam ukamalizika kwa matokeo ya sare ya bao 1-1 na Yanga kupoteza kule Zambia kwa kufungwa mabao 2-1
Wakashuka michuano ya Shirikisho wakapangwa na Pyramids, wakaupeleka mchezo jijini Mwanza lakini bado Yanga ikafungwa mabao 2-1 na kule Misri ikafungwa mabao 3-0
Ushindi katika mechi za nyumbani kwa Wananchi katika mechi za Kimataifa limekuwa jambo gumu tangu mwaka 2016
