Tunazidi kuimarika - Nsajigwa

Kocha Msaidizi wa Yanga Shedrack Nsajigwa amewasifu vijana wake kwa kufanikiwa kutinga nusu fainali ya michuano ya kombe la Mapinduzi baada ya kuichapa Taifa ya Jan'gombe mabao 2-0 katika mchezo uliopigwa Ijumaa usiku.

Ushindi huo umeifanya Yanga kufikisha alama tisa baada ya pia kuzifunga Mlandege (2-1) na JKU (1-0).

Yanga iko nafasi ya pili nyuma ya Singida United ambayo nayo imefuzu hatua ya nusu fainali baada ya kushinda michezo yake mitatu pia.

Singida United inaongoza kundi A ikiwa na alama tisa na tofauti nzuri ya mabao (+6) huku Yanga ikiwa na (+4).

Akizungumza baada ya mchezo wa jana, Nsajigwa amesema Yanga ilianza taratibu michuano hiyo lakini inazidi kuimarika katika kila mchezo.

Nsajigwa kwa kushirikiana na mwenzake Noel Mwandila wamekuwa wakiwapa nafasi wachezaji wote wa kikosi cha Yanga waliosafiri na timu visiwani Zanzibar.

Utaratibu huo umesaidia kufanya kikosi cha Yanga kime imara wakati wote licha ya ugumu wa ratiba ya michuano hiyo ambayo haina muda wa mapumziko kwa wachezaji.

Aidha Nsajigwa amesifu viwango vinavyoonyeshwa na wachezaji wake na amesema kikosi chake kina uwezo wa kutwaa ubingwa kama wataendeleza kiwango walichonacho sasa.