Afisa Mhamasishaji wa Yanga Antonio Nugaz amesema mchezo dhidi ya Zanaco Fc umewapa kipimo sahihi katika maandalizi kuelekea mchezo wa ligi ya mabingwa dhidi ya Rivers United utakaopigwa Septemba 12 kwenye uwanja wa Benjamin Mkapa
Nugaz amesema lengo la mchezo huo halikuwa kupata matokeo zaidi, bali lilikuwa kuwaonyesha mashabiki timu yao na kocha kuangalia ni wachezaji gani anaweza kuwajumuisha katika kikosi chake cha kwanza
"Sisi matokeo hayatupi shida sana kwani lengo kuu halikuwa matokeo pekee. Shughuli nzima ilikuwa kuwatambulisha wachezaji ili mashabiki wawaone na kocha kuangalia mahitaji ya kikosi chake cha kwanza. Zanaco Fc ni timu nzuri wametupa kipimo sahihi"
"Tumefanya usajili mzuri, wachezaji wameonekana sasa kinachofuata ni jukumu la kocha na benchi lake la ufundi kukiweka sawa kikosi chake. Lakini nikuhakikishie jambo moja, msimu huu ni wetu," alitamba Nugaz
Mchezo huo wa kirafiki uliopigwa uwanja wa Benjamin Mkapa, ulimalizika kwa Zanaco kupata ushindi wa mabao 2-1
Bao la Yanga lilifungwa na mshambuliaji Heritier Makambo ambaye amerejea na kuendeleza pale alipoishia misimu miwili iliyopita
Pia nyota wengine wapya Jesus Moloko, Yannick Bangala, Shabani Djuma, Dickson Ambundo na Fiston Mayele walipata nafasi katika mchezo huo
Kocha Nasreddine Nabi alifanya mabadiliko ya kikosi chake kwenye kipindi cha pili ikiwa ni pamoja na timu kubadili jezi
