Kuelekea kilele cha Wiki ya Wananchi, uongozi wa Yanga umepanga kuweka rekodi mpya tofauti na ilivyokuwa katika msimu uliopita
Akizungumza jijini Dar es Salaam jana Mwenyekiti wa Kamati ya Hamasa, Suma Mwaitenda alisema kumalizika kwa msimu uliopita ni mwanzo wa msimu mpya ambapo katika kilele cha sherehe hizo, wanatarajia kufanya shughuli mbalimbali za kijamii pamoja na uzinduzi wa jezi mpya.
Mwaitenda alisema kilele cha Wiki ya Wananchi kitakuwa ni Agosti 29, mwaka huu wakati uzinduzi utafanyika kesho Jumapili huko Zanzibar na mgeni rasmi ni Makamu wa Pili wa Rais wa Serikali ya Mapinduzi Zanzibar, Hemed Suleiman.
"Lengo la Wiki ya Wananchi ni kurudisha shukrani zetu kwa mashabiki kwa kufanya mambo mbalimbali ikiwamo kuchangia damu, kupanda miti na kutoa msaada kwa wasiojiweza, tutafungua matawi mawili pamoja na kugawa magodoro katika Hospitali mbili za Mwembeladu na Mnazi Mmoja," alisema Mwaikenda.
Alisema pia kutakuwa na maandamano yatakayoanzia Makao Makuu ya Yanga, kabla ya kuanza maandamano hayo wataenda kumtembelea mlezi wao, Mama Fatma Karume na baadae wataelekea Kisiwa Ndui ambapo 'amelala' Mzee Karume kwa ajili ya kufanya dua.
"Msimu huu tumekuja kivingine kabisa, siku ya kilele kuna mambo mengi ya kuwashtukiza wanachama na mashabiki wa Yanga, ikiwamo kutambulisha baadhi ya watu wa benchi la ufundi pamoja na kauli mbiu yetu ya msimu huu"
Kaimu Katibu Mkuu wa Yanga, Haji Mfikirwa, alisema hii ni shughuli yao wananchi na wanapaswa kujitoa na kamwe hawapaswi kuuangusha uongozi.
Mfikiriwa alisema kila jambo hupimwa mwisho, hivyo siku ya kilele ndio kila kitu kitawekwa hadharani kushuhudia 'suprise matata' tofatuti za zile zilizozoeleka.
Kikosi cha Yanga kiko nchini Morocco wakiendelea kujifua kwa ajili ya kujiimarisha kuelekea msimu mpya wa Ligi Kuu Tanzania Bara, mashindano ya Kombe la FA na michuano ya kimataifa ya Ligi ya Mabingwa Afrika
Lakini August 29 Wananchi watapata nafasi ya kuishuhudia timu kwa mara ya kwanza baada ya kuwa imeboreshwa
